وسله‌والو په سيوۍ کې د پاکستان ۵ سرحدي عسکر وژلي دي

د پاکستان د پوځ د عامه اړيکو اداره وايي، وسله‌والو کسانو د بلوچستان په سيوۍ سيمه کې د سرحدي پوليسو پر ګزمه بريد کړی دی او ځای پر ځای يې پنځه تنه ورڅخه وژلي دي.

دغه بريد نن سهار د سيوۍ په سنګن سيمه کې شوی او وسله‌وال تر بريد وروسته په اسانۍ د پېښې له ځايه تللي دي.

د پاکستان د پوځ د عامه اړيکو اداره وايي، په بريد کې وژل شوي کسان ظفر علي، هدايت الله، ناصر عباس، بشير احمد او نور الله نومېږي.

د پوځ په خبره، تر بريد وروسته دوی په سيمه کې ګرځي، خو بريد کوونکي په لاس نه ورځي.

تر اوسه د بريد مسووليت چا نه دی منلی، خو په بلوچستان کې دغسې بريدونه ټول بلوڅ ملتپال کوي.

اول ځان، بيا نور له کرونا وساتئ.