لاهور؛ د حافظ سعيد کور ته څېرمه چاودنې ۱۸پاکستانيان وژلي او ژوبل کړي دي

د پاکستان په لاهور کې د جماعت الدعوة د ترهګرې ډلې د مشر حافظ سعيد کور ته څېرمه چاودنه شوې چې پکې تر اوسه دوه تنه وژل شوي او شپاړس نور ژوبل دي.

دغه چاودنه د لاهور په ګوښه ځای، جوهر ټاون کې شوې ده.

له سيمې په ورکول شويو خبرونو کې ويل شوي دي چې چاودنه خورا خونړۍ وه او يو شمېر کورونه يې هم نړولي دي.

د لاهور د جناح روغتون مسوولين وايي، په شپاړسو وروړل شويو ټپيانو کې د شپږو تنو وضعيت ډېر خراب دی او ښايي مړه شي.

په ژوبلو شويو کسانو کې پاکستاني پوليس، ښځې او ماشومان هم شامل دي.

پاکستانۍ رسنۍ د چاودنې په اړه ګډوډ مالومات خپروي، ځينې يې د موټرسايکل بم چاودنه بولي او ځينو نور بيا وايي، چاودنه په يوه ريکشا کې د ايښوول شوي ماين د چاودېدو له امله شوې ده.

تر اوسه د پېښې مسووليت چا نه دی منلی.

اول ځان، بيا نور له کرونا وژغورئ.