ولسمشر ايران ته؛ د مفتو اوبو وخت ولاړ، خوښه مو تېل راکوئ، که بل شی

ولسمشر محمد اشرف غني نن په نيمروز کې د کمال خان بند د پرانيستو په مراسمو کې وويل، د مفتو اوبو وخت تېر شوی، هيڅ ګاونډی تر دې وروسته د افغانستان شېرينې اوبه وړيا نه شي تر لاسه کولای، بلکې بيه به يې پرې کوي.

ولسمشر وويل، تر دې مخکې ايران ته د افغانستان اوبه خوشې روانې وې، خو تر دې وروسته به ايران يا د اوبو په بدل کې افغانستان ته تېل راکوي او که تېل نه وي، په نورو توکو هم د اوبو سودا ورسره کېږي.

ولسمشر وويل، د چا زړه ته نه لوېده، خو اوس د وطن خلک په دې باوري شوي چې موږ کولای شو، خپلې ټولې اوبه مهار کړو.

ده وويل، له ملي شورا هيله کوي چې د ده ملاتړ وکړي او د اوبو په مهارولو کې ورسره خپل مسووليت ادا کړي.

کمال خان بند د نیمروز ولايت په چهار بورجک ولسوالي کې جوړ شوی دی چې دوه پنځوس ميليونه مټر مکعب اوبه زېرمه کولای شي او شاوخوا پنځه اويا زره هکټار ځمکه خړوبوي.

په دې سربېره، دغه بند د نهه مېګا واټه برېښنا د جوړولو جوګه هم دی.