په کوټه کې ځانمرګي بريد ۵۸ مړه او ټپيان کړل 

نن د بلوچستان په مرکز کوټه ښار کې د رايې ورکولو پر يوه مرکز ځانمرګی برید شوی دی چې له امله یې اته ويشت تنه وژل شوي او دېرش نور ژوبل دي.‌

د کوټې د پوليسو مشر عبدالرزاق چیمه وايي، نن يوه ځانمرګي غوښتل چې د کوټې په مشرقي بای پاس سيمه کې د رايې ورکولو يوه مرکز ته ننوځي، خو پوليسو یې مخه نيولې او ده هم د مرکز په دروازه کې ځان چوولی دی. 

دی وايي،‌ په پېښه کې تر اوسه پورې اته ويشت تنه وژل شوي او دېرش ټپيان روغتون ته لېږدول شوي دي،‌ خو وايي،‌ کېدای شي د مړو شمېر ډېر شي. 

د کوټې د ملکي روغتون ډاکټران وايي،‌ په ټپيانو کې د ځينو روغتيايي حالت نازک دی. 

تر اوسه د بريد مسووليت چا نه دی منلی، خو په کوټه کې تر دې وړاندې ورته بريدونه بلوڅ ملتپالو کول. 

په پاکستان کې نن ټاکنې روانې دي او خلک د خپلې خوښې نوماندانو ته رایې ورکوي.‌