۷ ثور ۱۳۹۷ 188217 0 نظر روزنامه سرخط

د اضطراب نښې نښانې او درملنه

د ډار، وېرې اواندېښنې احساس

نه کنټرولېدونکی اجباري وسواس او فکر
د ناارامونکو تېرو ترخو پېښو یاد ته راتلل
د ناتوانۍ او کمزورۍ احساس
له ناپاکۍ څخه وېره، پرله‌پسې د لاسونو پرېمنځل
د لاس و پښو یخېدل او یا خولې کېدل
د ساه بندېدل
د زړه ضربان زیاتېدل
د خولې وچوالی
د لاس او پښو بې‌حسه او یا هم مېږي مېږي کېدل
د عضلاتو شخوالی
ګنګسیت
د کمزورۍ احساس

کله چې له پورته نښو نښانو سره مخامخ شوئ او داحالت دوامداره پاتې شو، نو هرومرو تر ټولو نږدې روغتیایي مرکز ته ورشئ.

هغه لاملونه چې په اضطراب د مبتلا کېدو چانس زیاتوي

د کوچنيوالي پر وخت ناخوالې
د ناروغۍ په دوران کې که یو څوک د کومې ناروغۍ له لاعلاجي ځورېږي.
د دوستانو او خپلوانو مرګ
سټرس
د یو چا ځانګړي خصوصیات
د نشه‌يي توکيو او شرابو کارول

هغه ستونزې چې د اضطراب په پایله کې کېدای شي را منځ ته شي

ژور خپګان
په نشه‌يي توکيو روږدي کېدل
دوامداره سردردي
د غاښونو ستونزې
د هضمي سیسټم ستونزې

د اضطراب درملنه

که ستونزه ډېره پرمختللې نه وي کېدای شي د ناروغ رواني درملنه وشي او په یوشمېر حالاتو کې د درملو په واسطه درملنې ته اړتیا پیدا کېږي چې ستاسې معالج داکټر کولای شي، له ناروغي سره سمه درملنه انتخاب کړي.

کورنۍ درملنه:

له اضطرابه د خلاصون لپاره ناروغ کولای شي، پخپله له ځان سره مرسته وکړي.

رواني تسکين او عبادت
سپورټ
د شرابو او نشه‌يي توکيو له کارولو ډډه کول
له سګرېټ څکولو ډډه کول
د کافین لرونکيو موادو کم او یا هيڅ نه کارول
د ځانګړيو تمرینونو اجراکول
په کافی اندازه خوب کول
مناسب خوراک کول
خوب او اراموونکي تمرینونه

ډېره بې‌خوبي د سټرس لامل ګرځي او په پایله کې د ژور خفګان لامل هم کېدای شي. لږ تر لږه باید د شپې له خوا له اوو تر اته ساعته خوب کول په کار دي. کله چې ډېر ستړي شوئ او د ناارامي احساس وکړئ، نو په ارمه څملئ او یو څو ځله ژوره ساه واخلئ، داعمل څو ځلې تکرار کړئ او لاندې دغه تمرين هم وکړئ؛

لس دقيقې پر څوکۍ ارام کښېنئ
خپل تنفس ته مو پام وساتئ
یوه ژوره ساه واخلئ او تر دريو او څلورو ثانیو پورې خپله ساه وساتئ، وروسته یې په ارامه ارامه بیرون اوباسئ، دا کار څو ځلې تکرار کړئ.
د بدن مختلف عضلات مو په منظمه توګه کش او سست کړئ، دا عمل څو ځله تکرار کړئ، د پښو له ګوتو یې شروع کړئ او تر پایه د ټول بدن عضلات مو په همدې توګه تمرین کړئ.
د یوې مودې لپاره مو ځان سست او شل ونیسئ، خپل فکر مو هم را ټول کړئ
له هرې ستړیا وروسته حتماً ژوره ساه واخلئ او وجود مو سست ونیسئ
پلي وګرځئ یا قدم ووهئ