په کچلاغ کې د طالبانو په مهم مرکز کې چاودنه شوې

نن ماسپښين د کوټې په پنځه ويشت کيلو مټري کې، د کچلاغ په وزير اباد سيمه کې د طالبانو په يوه مهم مرکز کې چاودنه شوې ده.

دغه چاودنه د يوې مدرسې په جومات کې د جمعې د لمانځه پر مهال شوې ده.

سرچينې وايي، د چاودنې پر وخت په جومات کې تر دوه سوه زيات کسان و چې د لومړنيو تر لاسه شويو مالوماتو په اساس، لس تنه پکې وژل شوي او ګڼ شمېر نور ژوبل دي.

خو پاکستانۍ رسنۍ په چاودنه کې د پنځو تنو وژل کېدل او د لسو نورو ژوبلېدل مني.

ځينې سرچينې وايې، په چاودنه کې د طالبانو د ډلې مهم مشران هم يا وژل شوي او يا ژوبل دي چې دا مهال د کويټې ملکي او پوځي روغتونونو ته لېږدول شوي دي.

تر اوسه د چاودنې مسووليت چا نه دی منلی.