په میانمار کې بندي خبریالان خوشې شول

دوه خبریالان چې په میانمار کې په اووه کاله بند محکوم شوي وو، د دغه هېواد د ولسمشرۍ ماڼۍ له بښنې وروسته خوشې شول.

د رویټرز خبري اژانس لیکي، دغه خبریالان وا لون او کیاو سو وو چې د وژل شویو مسلمانانو قضیه یې څېړله او څه باندې ۵۰۰ ورځې په زندان کې پراته وو.

وا لون له زندانه د ازادېدو پر مهال وویل چې هېڅکله به له خبریالۍ لاس وانه‌خلي.

دواړو خبریالانو د میانمار په ستر ښار ینګون کې په داسې زندان کې چې شرایط یې ډېر سخت دي، تقریباً ۱۶ میاشتې په توقیف کې تېرې کړې.

دوی د دولتي اسرارو د قانون تر پښو لاندې کولو په تور په اووه کاله بند محکوم شوي وو.

خبریالان له هغو زرګونو نورو بندیانو سره یو ځای د بښنې د بهیر له لارې خوشې شول چې هر کال د میانمار د نوي کال په مراسمو کې ترسره کېږي.