د راتلونکې جمعې په شپه سپوږمۍ تندر نيسي

ستوري پېژندونکي وايي، د راتلونکې جمعې شپه يا د جولای د مياشتې د اووه ويشتم او اته ويشتم تر منځ شپه، سپوږمۍ تندر نيسي او تقريبا په ټوله نړۍ کې به تندر نيولې سپوږمۍ وليدل شي.

په افغانستان کې به سپوږمۍ په پشپړه توګه د شپې په پوره دوولس بجې تندر ونيسي او پر دوولس بجې او درې پنځوس دقيقو به له ځمکې بېخي واضحه ښکاري.

دغه تندر نيولې سپوږمۍ به په اروپا، اسيا، اسټراليا، افريکا، شمالي امريکا، انټرکټيکا او د نړۍ په ډېرو نورو سيمو کې وليدل شي.

ستورې پېژندونکي وايي، سپوږمۍ به د همدې شپې په درې بجې او نهه پنځوس دقيقې له تندر څخه بېرته خلاصه شي.

دوی وايي، په دغه شپه به د ځمکې سيوری پر سپوږمۍ پروت وي.