ايران وايي، سيند ته د افغان مسافرو غورځول، امريکايي ډرامه ده
۱ جوزا ۱۳۹۹ 148 0 نظر سرخط ورځپاڼه

ايران وايي، سيند ته د افغان مسافرو غورځول، امريکايي ډرامه ده

 

ايران وايي، عسکرو يې هيڅ افغان مسافر نه وهلی او نه يې سيند ته غورځولی دی، بلکې دا يوازې د امريکا فتنه او ډرامه ده چې غواړي په دې توګه د افغانستان او ايران تر منځ اړيکې ترينګلې کړي.

 

د ايران د پوليسو مرستيال مشر قاسم رضايي نن هلته له رسنيو سره په خبرو کې وويل، د روانې مياشتې په پيل کې د افغانستان او ايران پولې ته څېرمه، هريرود سيند ته د افغان مسافرو د غورځولو کيسه د امريکا او افغان رسنيو ګډه ډرامه ده چې غواړي د ايران پر ضد نفرت خپور کړي.

 

ده وويل، نه دغه کيسه حقيقت لري، نه د ايران پوليسو څوک اوبو ته غورځولي، نه بايد په دې خبرو باور وشي، بلکې په خبره يې، ښايي افغانان به امريکا او هغو رسنيو ته چې دغسې خبرونه خپروي، ځواب ورکړي.

 

تېره اوونۍ د افغانستان د بهرنيو چارو وزارت اعلان کړی و چې د ايران او افغانستان حکومتونه به په ګډه دغه پېښه څېړي.

 

تر دې وړاندې ولسمشر غني هم امر کړی و چې دغه کيسه دې بابېزه نه بلل کېږي.

 

د ايران سرحدي پوليسو د روانې مياشتې په پيل کې هلته تللي شاوخوا پنځوس مسافر تر وهلو وروسته اړ کړي ول چې سيند ته ځانونه وغورځوي او په دې توګه يې له ډلې د اتلسو تنو جسدونه وموندل شول.

ستاسې نظر

لټون

موږ په فېسبوک کې