رايې خوندي دي؛ افغان سرتېري ټاکنې تاوتريخوالي ته نه پرېږدي
۴ قوس ۱۳۹۸ 351 0 نظر سرخط

رايې خوندي دي؛ افغان سرتېري ټاکنې تاوتريخوالي ته نه پرېږدي

رايې خوندي دي؛

افغان سرتېري ټاکنې تاوتريخوالي ته نه پرېږدي

تېرو تجربو، د ولسمشري ټاکنو لانجمنولو، د نوماندانو له لوري د ټاکنو د پایلو نه منلو، د ټاکنو کمېسیون د چارو پر وړاندې خنډ جوړولو او د ځینو نوماندانو او د هغوی پلویانو ګواښونو ته په پام، ګڼ ‌شمېر هېوادوال وېره لري چې د ولسمشري روانې ټاکنې یو ځل بیا د تېرو هغو په څېر لانجمنې او هېواد د کړکېچ خوا ته لاړ نه‌شي.

د کابل یو اوسېدونکی حبیب‌الله حق‌پرست وايي، د ځان او هېواد راتلونکي سرنوشت ټاکلو په موخه په سختو شرایطو کې د رایې ورکولو مرکز ته لاړ او خپله رایه یې وکاروله، خو په وینا یې، یو شمېر نوماندان د خلکو پر ارادې ملنډې وهي او د هغوی د رایو پایلې ته غاړه نه ږدي.

حق‌پرست وېره لري، هسې نه چې ټاکنې لانجمنې شي، په هېواد کې کړکېچ جوړ شي او له کبله یې عامو خلکو او وطن ته زیان ورسېږي.

اوس د ولسمشري یوه نوماند عبدالله عبدالله پلویانو په اوو ولایتونو کې د رایو بیا شمېرنې بهیر مخه نیولې او ځینو مخکښو پلویانو یې د ټاکنو لانجمنولو او تاوتریخوالي را منځ ته کولو په اړه هم خبرداری ورکړی دی.

د دې تر څنګ د ولسمشري یو بل نوماند ګلبدین حکمتیار او رحمت‌الله نبیل هم د عبدالله خوا نیولې، د رایو بیا شمېرنې بهیر یې تحریم کړی او هڅه کوي چې د دې پروسې مخه ونیسي او د ټاکنو پروسه د کړکېچ خوا ته بوځي.

خو افغان ځواکونه خلکو ته ډاډ ورکوي چې هيچا او هيڅ ډلې ته به د ټاکنو ملي پروسې د لانجمنولو او له کبله یې په هېواد کې کړکېچ راوستو ته اجازه ور نه کړي.

د ملي دفاع وزارت سرپرست وزیر اسدالله خالد پرون د «سولې او امنیت» په نوم یوې جوړې شوې غونډه ته وویل، هيچا ته به اجازه ور نه کړي چې ټاکنې د کړکېچ لوري ته بوځي او په هېواد کې د تاوتریخوالي لپاره هڅه وکړي.

د خالد په وینا، امنیتي ځواکونه به په ټاکنو کې خپله بې‌طرفي وساتي، خو په وینا یې، اوس افغان ځواکونه د دوښمن د توطیو تر څنګ، د هر ډول کورنۍ بلوا جوړولو او تاوتریخوالي د مخنیوي وړتیا لري.

اسدالله خالد وايي، که څه هم باور لري چې افغان سیاستوال به خپل درایت سره په هېواد کې د کړکېچ را منځ ته کېدو مخه ونیسي، خو په وینا یې، که کوم لوری یا ډله هڅه وکړي چې په ولسمشري ټاکنو کې په هره پلمه هېواد کړکېچ ته سیخ کړي، افغان ځواکونه به په وطن کې د بې‌نظمي او خلکو ته د سرخوږي جوړولو د مخنیوي لپاره د هغوی پر وړاندې ودرېږي.

په همدې حال کې د پوهنتون استاد او د سیاسي چارو شنونکی عبیدالله وردګ وايي، امنیتي او دفاعي ادارې اوس د مشخصو ډلو او پخوانیو توپکیانو په لاس کې نه‌ دي او د تېر په پرتله پکې د پام وړ اصلاحات راغلي دي.

د هغه په باور، افغان ځواکونه چې له شاوخوا شل ترهګرو ډلو سره جنګېږي، په کور دننه د کوچنیو کړکېچونو د مخنیوي وړتیا هم لري. هغه ډاډه دی چې د ټاکنو ملي پروسه به د کړکېچ او تاوتریخوالي خوا ته نه ځي، خو په وینا یې، که ځینې کسان او ډلې یې لپاره هڅه وکړي، افغان ځواکونه یې باید پر وړاندې ودرېږي او اجازه ور نه کړي چې افغانان یو ځل بیا تېرې تجربې وویني.

وردګ د ولسمشري په نوماندانو هم غږ کوي چې قانون، د خلکو ارادې او د ټاکنیزو کمېسیونونو پرېکړو ته غاړه کېږدي او خپلو موخو او ګټو ته د رسېدو لپاره دې د ټاکنو ملي پروسه نه زیانمنوي او نه دې هم پر ولسواکي د خلکو باور ته زیان اړوي.

دا په داسې حال کې ده چې د عبدالله عبدالله په ګډون د ولسمشري نوماندان ګلبدین حکمتیار او رحمت‌الله نبیل د ټاکنو پروسې لانجمنولو او په هېواد کې د کړکېچ را منځ ته کېدو په اړه خبرداری ورکړی او د راپورونو له مخې، ځینې یې عملاً د دغه کار لپاره چمتووالی نیسي.

د ټاکنو خپلواک کمېسیون د مهالوېش له مخې، ټاکل شوې وه چې د ولسمشري ټاکنو لومړنۍ پایله د تلې میاشتې په ۲۷مه او وروستۍ هغه یې هم د لړم په ۱۶مه اعلان شي، خو کمېسیون تر اوسه نه‌ دی توانېدلی چې د نږدې دوو میاشتو په تېرېدو سره د ټاکنو لومړنۍ پایله اعلان کړي.

 

ايرانيانو ۱۴افغان پناګير ژوندي سوځولي

Jun 05, 2020 29

د ايران پوليسو د دغه هېواد په يزد سيمه کې هغه څوارلس افغان ځوانان ژوندي سوځولي دي چې هلته يې پناه غوښته.

امارت يو بل درز هم وکړ؛ ‏م‌م؛ د قطر طالبانو له امريکا سره د تړون پر ډېرو مالوماتو خاشه اچولې

Jun 02, 2020 29

ملګرو ملتونو د طالبانو په اړه په خپل وروستي خپاره شوي راپور کې ويلي دي چې د امريکا او طالبانو تر منځ د تړون پر سر طالب اورپکي په خپلو کې سره بدګمانه شوي او همدا بدګماني د دې لامل [...]

په شپږ مياشتې کې د حکومت ټول سرپرست چارواکي ګوښه کېږي

Jun 01, 2020 29

ارګ پرېکړه کړې ده چې تر راتلونکيو شپږو مياشتو پورې به په مرکز او ولايتونو کې ټول هغه حکومتي کارکوونکي له دندو ګوښه کوي چې د سرپرستانو په توګه کار کوي.

ستاسې نظر

لټون

موږ په فېسبوک کې