په پاکستان کې د رېلګاډو ټکر تر سلو ډېر مړه او ټپيان کړي دي
پاکستاني چارواکي وايي، نن سهار د سيند ايالت په ګوټکي سيمه کې دوه رېلګاډي سره ټکر شوي دي چې له امله يې تر اوسه يو دېرش تنه مړه شوي او د اوياوو تنو په شاوخوا کې نور ژوبل دي.
د ګهوټکي سيمې د پوليسو مشر عبدالله عثمان وايي، لومړی له کراچۍ څخه سرګودې ته د روان ملت ايکسپريس رېلګاډي څو خونې له ليکې اوښتې او دويمه ليکې ته لوېدلې دي چې له هغې خوا ورباندې د سرسيد ايکسپريس په نامه رېلګاډی راغلی او تر خېټه يې لاندې کړې دي.
دی وايي، د پېښې له ځايه تر اوسه د يودېرشو تنو جسدونه راټول شوي او تر اويا زيات ژوبل دي.
عثمان وايي، د رېلګاډي په ځينو خونو کې لا هم مسافر بند پاتې دي چې د را ايستلو هڅې يې کېږي.
په پاکستان کې له کاره لوېدلي رېلګاډي او زړې پټلۍ يې وخت ناوخته د دې لامل کېږي چې دغسې مرګونې پېښې کېږي.
اول ځان، بيا نور له کرونا وساتئ.
0 نظرونه