د بلوڅو يو مهم قوماندان وژل شوی، خو د وژلو ځای یې مالوم نه دی

د بلوڅو يوه ملتپاله ډلې بلوچ ليبرېشن ارمي وايي، يو مهم جنګي قوماندان يې وژل شوی، خو د ځای په اړه يې څه نه دي ويلي چې چېرته وژل شوی دی.

د دغې ډلې وياند جييند بلوڅ سرخط ورځپاڼې ته په يوه رالېږلې خبرپاڼه کې ويلي دي چې دښمن يې يو مهم کس ورڅخه وژلی دی.

د بلوڅو دغه قوماندان مير عبدالنبي بنګلزی نومېږي چې د جنګ په ليکو کې په چونکا مير مشهور و.

بلوڅ وايي، بنګلزي له تېرو دوو لسيزو راهيسې د پاکستان د حکومت پر ضد وسله‌واله مبارزه کوله او بالاخره په مرموزه توګه ووژل شو.

هغه په دوه زره دويم کال کې په بلوچ ليبريشن ارمي کې شامل شوی و او تر اوسه د دغې ملتپالې ډلې د مطرح قوماندان په توګه پاتې و.

دی په دوه زره دوولسم کال کې د بي‌ايل‌اې د قوماندان په توګه ټاکل شوی و.

جييند وايي، د هغه شهادت لويه ضايعه ده او تر ډېرو کلونو به ډکه نه شي.

تر اوسه د پاکستان حکومت هم په دې اړه څه نه دي ويلي.