کندهار؛ تادين خان پورته او سيد شريف يې پر ځای کښېناست
د کندهار مخکېني امنيه قوماندان تادين خان له خپلې دندې استعفا ورکړې او پر ځای يې سيد شريف د دغه ولايت امنيه قوماندان ټاکل شوی دی.
تادين خان د شهيد جنرال رازق خان تر شهادت وروسته پر دغه څوکۍ کار پيل کړ او دوه نيم کاله يې کندهار وساته.
ده په خپله استعفا کې ويلي؛ دغه مسووليت ته يې د شهید ستر جنرال عبدالرازق خان د کارنامو ساتلو او د لوی کندهار د ولسونو او نظامیانو په غوښتنه اوږه ورکړې وه.
په استعفالیک کې ويل شوي چې اوس دغه نظامي مسوولیت د ستر جنرال عبدالرازق خان یوه بل ملګري ته سپاري او خپله غواړي د هېواد په ملي سیاست، په ځانګړي ډول د سولې په پروسه کې د ولس خدمت وکړي.
تادین خان ویلي چې د لوی کندهار په استازيتوب يې د سولې د مصالحې شورا د رهبري غړیتوب اخیستی.
د کندهار نوی امنیه قوماندان ډګروال سید شریف تر دې وړاندې د درېیمې سرحدي لوا د څلورم کنډک قوماندان و.
0 نظرونه