بلوڅان وايي، نن يې اووه پوځيان وژلي او درې يې ټپيان کړي دي

د بلوڅ وسله‌والو دوه ډولې بلوچستان ليبرېشن فرنټ او بلوچ ليبرېشن ارمي وايي، د بلوچستان په دوو سيمو کې يې پر پاکستاني پوځيانو درې حملې کړې، اووه تنه يې پکې وژلي او درې نور يې ژوبل کړي دي.

د بلوچستان ليبرېشن فرنټ وياند مېجر ګهرام بلوڅ سرخط ورځپاڼې ته په يوه رالېږلې خبرپاڼه کې ويلي دي چې ملګرو يې د بلوچستان د پنجګور په پروم سيمه کې د پاکستاني پوځيانو يو ډک موټر په راکټ ويشتی دی.

دی وايي، په دغه موټر کې څلور پوځيان سپاره ول چې ټول همالته ختم شوي دي.

د بلوچ ليبرېشن ارمي وياند جييند بلوڅ بيا په يوه بېله خبرپاڼه کې سرخط ورځپاڼې ته ليکلي دي چې د دوی ملګرو بيا د بلوچستان د بولان په پير اسماعيل سيمه کې د پوځيانو پر موټر چاودنه کړې ده.

دی وايي، په چاودنه کې يو پوځي وژل شوی او بل ژوبل دی، خو سيمې ته چې نور پوځيان مرستې ته راغلل، بله چاودنه يې پسې پرې کړې، دوه يې پکې وژلي او دوه نور يې ژوبل کړي دي.

دی وايي، دواړو موټرو اور اخيستی او له کاره وتلي دي.