محسن داوړ لاره بېله کړه؛  محسن له افراسياب خټک سره، بله سياسي ډله جوړوي
۴ حوت ۱۳۹۹ 736 0 نظر سرخط ورځپاڼه

محسن داوړ لاره بېله کړه؛ محسن له افراسياب خټک سره، بله سياسي ډله جوړوي

 

د پښتون ژغورنې غورځنګ سرلاري او د پاکستان د ملي شورا غړي محسن داوړ له پښتون ژغورنې غورځنګ څخه لاره بېله کړې او د ځينو نورو پښتنو سياسي مشرانو په ملګرتيا غواړي له دغه غورځنګ بېله، يوه بله سياسي ډله جوړه کړي.

 

له محسن داوړ سره د عوامي نېشنل ګوند پخوانی سناتور افراسياب خټک، د عوامي نېشنل ګوند مخکېنی غړي لطيف اپرېدی، بشرا ګوهر او د عوامي نېشنل ګوند مخکېنۍ غړې جميله ګيلاني هم ملګري دي.

 

دوی دغه پرېکړه تېره ورځ وروسته له هغه کړې چې د پښتون ژغورنې غورځنګ مشر منظور پښتين وويل، غورځنګ يې پارلماني سياست نه کوي او نه هم غواړي د پاکستان له حکومت سره کار وکړي.

 

د دوی له منځه ځينو سرچينو سرخط ورځپاڼې ته ويلي دي چې محسن داوړ د پښتون ژغورنې غورځنګ د تګ له لومړۍ ورځې لا هڅې کولې چې منظور پښتين وهڅوي چې له غورځنګ څخه د پاکستان يوه سياسي ډله جوړه کړي، خو هغه و نه منله.

سرچينې وايي، محسن داوړ علي وزير هم هڅولی و چې د سياسي ډلې په جوړولو کې ورسره لاس يوسي، خو هغه هم ورڅخه مخ اړولی و.

 

تر اوسه د محسن داوړ او افراسياب خټک د سياسي ډلې نوم نه دی روښانه، خو د دوی له منځه راوتلي مالومات ښيي چې دا مهال يې پر منشور جوړولو بوخت دي.

 

دغه مالومات ښيي چې محسن داوړ غواړي د سياسي ډلې تر جوړولو ورووسته هم له پښتون ژغورنې غورځنګ سره د ځينو نورو سياسي ډلو په څېر راشه درشه ولري او اړيکې ورسره خړې پړې نه کړي.

 

د پښتون ژغورنې غورځنګ ځينو مهمو کسانو سرخط ورځپاڼې ته ويلي دي چې د منظور پښتين زړه له ډېره وخته پر محسن داوړ غل و.

 

دوی وايي، محسن داوړ د پښتون ژغورنې غورځنګ په استازيتوب له بېلابېلو سياسي ډلو ټپلو سره تارونه غځولي وو او دې کار منظور پښتين اندېښمن کړی و چې د پښتنو دغه غورځنګ ورڅخه برمته نه کړي.

 

محسن داوړ وايي، دوی پر سياسي مبارزه باور لري، نو ځکه غواړي يوه سياسي ډله جوړه کړي.

 

تر دې وړاندې چې په دوه زره اتلسم کال کې د پښتون ژغورنې غورځنګ غړيو محسن داوړ، علي وزير او عبدالله ننګيال ځانونه د پارلمانو څوکيو ته کانديد کړي وو، د پښتون ژغورنې غورځنګ مشر منظور پښتين ويلي وو چې دا يې شخصي پرېکړه ده، غورځنګ يې نه ملاتړ کوي او نه يې هم غندنه.

 

د پښتون ژغورنې غورځنګ په رهبري کې وروسته له هغه ناندرۍ او ترينګلتيا پيدا شوه چې د دغه غورځنګ لپاره تګلاره او کړنلاره وليکل شوه او په هغې کې دوه داسې ټکي ول چې محسن داوړ پرې نيوکې درلودې.

 

له هغو ټکيو يو يې دا و چې د کومې بلې سياسي ډلې غړي کولای شي د پښتون ژغورنې غورځنګ سرلاري او پرېکړه کوونکي وو اوسي که نه؟ او دويمه يې دا چې دغه غورځنګ به پارلماني سياست کوي، که ناپارلماني؟

افغان سيکان او هندوان وايي، د پلار او نيکه پر ځمکو يې چور ګډ دی

Feb 26, 2021 29

د افغانستان هندوان او سيکان وايي، لا يې هم د پلرونو او نيکونو پر ځمکو چور ګډ دی او زورور يې له خپلو مېنو په زور شړي او ځمکې يې ورڅخه لاندې کوي.

سږ کال ۲۰۱۹ تنه افغان ماشومان شهيدان او ژوبل شوي

Feb 24, 2021 29

د افغانستان د بشري حقونو خپلواک کمېشن وايي، سږ کال هم په هېواد کې د ماشومانو پر ضد د تاوتريخوالي کچه لوړه وه او يوازې په ناامنيو او ځينو نورو پېښو کې سږ کال تر اوسه دوه زره او [...]

د افغانستان يونيم‌زر کلنه کلا بيا رغېږي

Feb 22, 2021 29

د افغانستان حکومت وايي، په کابل کې يې د بالاحصار د يو نيم زر کلنې کلا بيا جوړولو ته مټې را بډوهلې دي او ژر به د دغې تاريخي کلا د دېوالونو تهدابونه ټينګ او نور هم لاس ورباندې ووهل [...]

ستاسې نظر

لټون

موږ په فېسبوک کې