ټرمپ سر کښېود؛ کانګريس د بايډن بريا تاييد کړه
د امريکا پر کانګرس د ډونلډ ټرمپ د پلويانو تر بلوسه وروسته، د امريکا کانګرس جوبايډن د وروستيو ټاکنو ګټونکی اعلان کړ او ټرمپ هم اعلان وکړ چې واک به په سولهييزه توګه خوشې کړي.
پرون ناوخته د ټرمپ پلويان د امريکا پر کانګرس ور وختل او ګډوډي يې جوړه کړه. په دغه ګډوډي کې څلور تنه ووژل شول او دوه پنځوس نور نيول شوي دي.
تر لګه درګه وروسته د کانګرس غونډه له سره پيل او په ټاکنو کې يې د جوبايډن بريا تاييد کړه.
په دې اساس، جوبايډن په درې سوه شپږ رايو بريالی او ټرمپ د دوه سوه او دوه دېرش رايو په اخيستو ناکامياب اعلان شو.
د امريکا ولسمشر ډونلډ ټرمپ هم دغه پرېکړه منلې او ويلي يې دي چې واک به په سولهييزه توګه جوبايډن ته ورخوشې کړي.
ټاکل شوې چې ديارلس ورځې وروسته به ټرمپ سپينه ماڼۍ تر شا پرېږدي.
0 نظرونه