اسراييلو په سوريه کې ايرانيان او پاکستانيان وژلي
د سیرین ابزرویټري فار هیومن رايټس په نوم د سوريې د چارو څارونکې اداره وايي، د اسراييلو هوايي ځواک په سوريه کې بمبارۍ کړې او پکې يې هغه ايرانيان او پاکستانيان وژلي چې د اسد د رژيم په ننګه جنګېدل.
دغه اداره وايي، د اسراييلو هوايي ځواک دغه بريد د ديرالزور په ابوکمال سيمه کې کړی دی او پکې د وژل شويو کسانو لويه برخه پاکستاني شيعهګان دي.
د سیرین ابزرویټري فار هیومن رايټس په خبره، دا په لنډه موده کې په سوريه کې پر ايراني او پاکستاني جګړهمارو د اسراييلو دويم بريد دی چې کېږي.
ايران څه موده وړاندې نه يوازې سوريې ته د اسد د رژيم د ملاتړ په پار خپل پوځي سلاکار ورلېږلی و، بلکې له افغانستان او پاکستان څخه يې پرېمانه شيعه مذهبي توندلارې هم د دغه رژيم په ملاتړ جګړې ته لېږلي دي.
په دې سربېره، د لبنان د حزب الله او عراق جګړه مار هم د ايران له خوا په سوريه کې جنګول کېږي.
0 نظرونه