واورو د هېواد بېلابېلې لارې وتړلې
د ټولګټو وزارت وايي، واورو اورېدو د هېواد بېلابېلې لارې د مسافرو پر مخ تړلې دي او په ډېری سيمو کې لا هم واوره اوري.
دغه وزارت سرخط ورځپاڼې ته په يوه رالېږلې خبرپاڼه کې ويلي دي چې په شمالي سالنګ کې سهار مهال واوره درېدلې چې اندازه یې ۱۵ سانټي مټره، خو په جنوبي برخه کې لا هم واوره اوري او ۱۷ سانټي مټرو ته رسېدلې ده.
د وزارت د وړاندوېني په اساس به په سالنګ کې د وارې اورېدل تر راتلونکيو ۱۲ ساعتونو دوام ولري.
دغه لويه لاره دا مهال د ټرېلري موټرو پر مخ تړل شوې، خو نور موټر د اړینو اوزارو په درلودلو سره پرې تګ راتګ کولای شي.
هلته د بدخشان په یاوان، راغستان او کوهستان ولسوالیو، د پنجشېر په پریان ولسوالي او انجمن کوتل او د غور ــ هرات او غور ــ کابل پر لویو لارو د واورې اورېدل دوام لري او دغه لارې د ټرافیکو پر مخ تړل شوې.
د ټولګټو وزارت وايي، ټیمونو يې د لارو د خلاصون هلې ځلې پیل کړې دي، خو دا چې سړکونه یخ وهلي، له خلکو يې غوښتنه کړې چې له سفره دې ډډه وکړي.
0 نظرونه