یو کریکټر خیریه بنسټ جوړ کړ

د کریکټ ملي لوبغاړي  راشد خان بې‌وزلو خلکو سره د مرستو لپاره خيريه ټولنه جوړه کړې ده.

راشد خان دا ټولنه د "راشد خان خيريه بنسټ" په نامه جوړه کړې او په پام کې لري چې لومړی په افغانستان کې له شاو خوا ۵۰۰ يتيم ماشومانو سره د ښوونځي په ورتګ کې مرسته وکړي.

راشد خان په ټولنيزه شبکه فيسبوک پاڼه کې لیکلي؛" درنو افغانانو! ستاسو د دعا په برکت مې د خپل ګران هېواد او هېوادوالو لپاره د خیر یو بل ګام اوچت کړ. د "راشد خان خیریه ټولنه" مې جوړه کړه."

هغه زياته کړې، ټولنه به په لومړي قدم کې افغان يتيمانو د پالنې او تعلیم لپاره کار کوي. ورسته به بیا په روغتيايي،  پاکو اوبو د رسولو او نورو بشري برخو ته فعالیت غځوي.

راشد خان ويلي، د خپلو هېوادوالو په مرستې او دعاوو دې ځای ته رسېدلى  او اوس يې وخت دی چې د خپل وس سره سم له خپلو خلکو سره مرسته وکړي.