د کندوز-تخار لویه لار خلاصه شوه

د کندوز سیمه‌ییز چارواکي د کندوز-تخار د لویې لارې د خلاصېدو خبر ورکوي.

دوی وايي، دا لاره له څلورو ورځو راهیسې د وسله‌والو طالبانو د تحرکاتو له کبله د ټرافیکو پر مخ تړلې وه.

په کندوز کې د امن او عامه نظم د ۸مې لوا قوماندان ډګروال عباس توکلي وايي، وړمه  ورځ افغان ګډو ځواکونو د دې لارې د خلاصېدو په هدف تصفیوي عملیات پیل کړي و چې په پایله کې یې د کندوز-تخار لویه لار د ټرافیکو پر مخ خلاصه شوه.

بل خوا د کندوز ولایتي شورا او خلک له دولته غواړي چې د دې لويې لارې په اوږدو کې شاوخوا کلي د طالبانو له شتونه تصفیه کړي.