له کندهاره تر ۲۰زره ټنه ډېر انګور بهر ته صادرېږي
د کندهار د سوداګرۍ خونې چارواکي وايي، له دې ولایت څخه د انګورو په صادراتو کې ډېروالی راغلی او تمه ده چې سږ کال به تر ۲۰زره ټنه ډېر انګور بهر ته صادر شي.
چارواکي وايي، د انګورو د صادراتو د ډېروالي لامل د انګورو معیاري بستهبندي او په یخچالي موټرو کې په سالمه توګه د هغو لېږد دی.
د کندهار د سوداګرۍ خونې مشر حاجي نصرالله زهیر وايي، سږ کال د کندهار د انګورو باغونه له ناروغیو او طبیعي افتونو سره نه دي مخ شوي چې له امله یې د نورو کلونو په پرتله حاصلات ښه او ډېر دي. هغه زیاته کړه، له همدې امله بهر ته د انګورو په صادراتو کې هم ډېروالی راغلی دی.
د انګورو د حاصلاتو او صادراتو د ډېروالي خبره داسې مهال کېږي چې دغه ولایت سختې وچکالۍ ځپلی او خلک د اوبو له سخت کمښت سره مخ دي.
0 دیدگاه